طبعا , زي ما إنتم عارفين .. إحنا داخلين على إنتخابات و أيام سودة , ومبقاش بيخلى حديث أو حوار من بين أي اتنين مواطنين مصريين من جملة " هتنتخب/ي مين ؟ " .. و رغم إقتناعي الشخصي إن مفيش إنتخابات هتتعمل أصلا , وحتى لو إتعملت فأنا مقاطعها أساسا .. بس ميضرش برضو
لاحظت إن إختيار الرئيس بقى متوقف على عوامل ثانوية عند البعض , و واخدين الأمور بإستخفاف أكتر من اللازم .. زي مثلا
موقفه من الثورة و نظام المخلوع , وموقفه من مجلس العسكر
ايدلوجيته و فكره , وهل هو إسلامي ولا ليبرالي ولا إشتراكي
هل بينادي بتطبيق الشريعة وكده ولا عايزها دولة مدنية - علمانية - والعياذ بالله وكفر وزندقة وإنحلال و حاجات من الي قلبك يحبها دي :D
كل ده كلام ميأكلش عيش في الزمن ده , في حاجات كتير أهم .. دي إنتخابات تحت إشراف مجلس مبارك العسكري , مش حاجة هزار يعني ! يعني مثلا ..
من أهم الشروط في رأيي إنه ميكونش منوفي , ولا يكون حب بنت في ثانوي جوز خالتها من المنوفية .. ولا يكون مصاحب واحد مراته ليها قرايب من المنوفية .. مش عنصرية ضد المنوفية لا سمح الله , بس تشاؤم بعيد عنكم
حاجة تانية مهمة برضو , قصة شعر الرئيس .. أيوا أومال ايه ! يعني يرضيكم رئيسنا يبقى قاعد في مؤتمر للأمم المتحدة وجنبه عيال مسبسبة وشعرها سايح من فرنسا و الأرجنتين وكندا .. وهو أقرع ؟ يرضيكم ؟ مزز العالم تقول علينا إيه ؟ انسوا خالص حكاية القرعة دي .. و لو إن 95% من المرشحين قرع , بس مش مشكلة .. إحنا ممكن نجيب واحد زي حمدين أو عمرو موسى و نوديه عند الواد حمادة جيل اللي فاتح محل حلاقة عالناصية .. وهو يضبطه
حاجة تالتة , بما إن احنا جيل الثورة والفيس بوك وعصر التكنولوجيا والكلام الحمصي اللي مبيأكلش عيش ده , وبما إن كل المرشحين عندهم أكونتات على تويتر , والريس اللي جي هيبقى أول رئيس في تاريخ مصر عنده أكونت تويتر , فأنا عايز ريس مينفضليش , يوم ما أبعتله منشن على تويتر يرد عليا ! و لو بعتله نكتة حلوة يعملي ريتويت .. ويحبذ لو يعملي فولو كمان , مفترض إن الريس في خدمة مواطنيه !
ولاده ومراته .. ده شئ مصيري طبعا .. انا عايز الريس يبقى عنده إبن إسمه تامر أو وائل أو لؤي .. بحيث يبقى إسمه أبو تامر .. إسم شرح كده ويدخل القلب على طول .. خد بس ياض يابو تامر أقولك ! وبالنسبة لمراته .. ميكونش ليها أي أصول إنجليزية .. ويفضل متكونش مهتمة بالقراءة .. وبتكره الأطفال .. ويحبذ الريس يكون متجوز 4 .. عشان الشعب يسير على دربه ونحل أزمة العنوسة وكده
وبما إن جمهورية مصر جمهورية أهلاوية صميمة , فطبعا مش محتاج اقولكم ان لجنة الانتخابات مفروض تقترح إن من شروط الترشح للرئاسة إنك تكون أهلاوي صميم .. وبتحضر 5 ماتشات في الموسم عالأقل في 3 شمال
اضرب بقى المواصفات دي في الخلاط ..و إعملي رئيس أوستيك .. حاجة شغل فنادق كده .. و أنا أوعدك أول ما نلاقي واحد بالمواصفات دي .. هقتنع إن إنتخابات العسكر مش تمثيلية كبيرة .. وهروح أنتخب :)
ليست هناك تعليقات:
إرسال تعليق