الاثنين، 31 أكتوبر، 2011

هـيـــهـ .. دنيا !! و اديني عملت مدونة زي باقي البشر

على بركة الله نبدأ
في مثل هذا اليوم , الموافق 31\10\2011 .. تم اففتاح مصحة شيزوفرينيا للأمراض النفسية و المقالات الهلسية

مبدأيا كده , لو وراك حاجة تعملها , اعملها .. بدل ما تضيع وقتك في قراية الشخابيط اللي انا بكتبها دي 
و أكيد وراك حاجة أهم يعني :D
ام هند , دي أول تدوينة أكتبها .. ايه اللي خلاني اعمل مدونة ؟ سؤال يطرح نفسه و بشدة

اكيد مش عاملها كحب استطلاع يعني , بس ممكن يكون السبب الرئيسي في ده , مكان اعبر فيه عن الأفكار اللي عمالة رايحة جاية ورا بعضها في الجمجمة 
خصوصا لما تبقى عايش في بلد مملة زي السعودية , النت فيها هو الوسيلة الوحيدة للتنفيس عن اي حاجة .. يللا ربنا ما يكتبها عليكم , الا لو ناويين تحجوا

و ممكن برضو أكون عملتها حبا في الرغي .. أنا بعيد عنكم لما بمسك ورقة و قلم ممكن اقعد يومين اكتب , حتى مستر العربي كان بيزهق من الحكاية دي في التعبير زمان 

و جايز عملتها كتدريب عالكتابة , عشان من ضمن احلامي اللي مش هتتحقق اني اخش كلية اعلام .. ادعوا انتوا بس الكام شهر الجايين دول يعدوا على خير .. مش مهم بقى اعلام ولا زراعة انلجش حتى :D

و في سبب رابع برضو .. انه تكون الأسباب التلاتة دي اتجمعت مع شوية أفكار ديمجوليقية في دماغي , فـ أدت إلى ما حدث , و اهو حدث و خلاص

المهم بقى , التدوينة دي كلها على بعضها شوية قلش على حبة استخفاف :D
اعتبر نفسك مقريتهاش

و من المرة الجاية , نبتدي نتكلم جد شوية بقى .. تشاو :)