الأحد، 5 فبراير، 2012

عالم ما تحت الأرض


...

دول شباب زي الورد , دول بيحبوا فرقتهم ويسافروا وراها في كل حتة , شوف بيعملوا رسومات جميلة ازاي في المدرج , قد ايه الولاد دول موهوبين وبيقدروا ينظموا نفسهم 

الكلام اللي فات ده هو الفكرة العامة عن شباب الالتراس عند عامة الجماهير والمتفرجين والمهتمين بالمجال الرياضي , مجرد شباب بيعمل دخلات في المدرج وبيرفع سنانير وبيولعله كام شمروخ يحتفل بيهم في آخر المتش .. بس كده !

نفس الفكرة دي متواجدة تقريبا عند الكثير من الثوار الغير مهتمين بالمجال الرياضي , اللي كل فكرتهم عن الاولتراس ان شباب كتير منهم كانوا رفاق في الثورة ورفاق في الميدان , ولكن لخبرتهم السابقة في التعامل مع الأمن والاحتكاك بيهم فكانوا هما دايما اللي بيتصدروا أي مشهد يحدث فيه اشتباكات .. لدرجة وصلت بالبعض لإطلاق عليهم حماة الميدان
لكن الواقع دايما مبيبقاش وردي , هناك واقع مغاير تماما , واقع مجهول .. واقع عنيف .. واقع دموي!

سبب كتابتي للسطور دي في الأساس هو جهل البعض بالوجه القبيح لعالم الاولتراس , اللي اتضح بكثافة بعد مذبحة بورسعيد , اللي اشترك فيها بشكل مباشر .. مجلس العسكر , الداخلية , جماهير المصري البورسعيدي وبالذات جروبات الالتراس الخاصة بالنادي

فعداء البعض مع المجلس العسكري , خلاهـ يغمض عينه عن أي واقع ,  ويحاول ينكر أي واقع حتى لو هو يجهله , لمجرد اثبات مسؤولية ان المجلس العسكري هو المدبر الاول والأخير بالتعاون مع الداخلية لهذه المجزرة .. بحجة ان الداخلية والعسكر بينتقموا من شباب الاولتراس لدورهم المؤثر والعظيم في الثورة

منكرش ان الداخلية ليها دور كبير في اللي حصل بسبب رغبة دفينة في الانتقام من شباب الالتراس , ومنكرش ان العسكر ليهم دور بصفتهم المسؤولين عن أي مصيبة سودة هتحصل في البلد بسبب ادارتهم الكارثية للبلاد وبسبب برضو هتافات اولتراس اهلاوي ضدهم في المباراة السابقة , وبسبب مشاركة اولتراس اهلاوي في جميع الأحداث الثورية الأخيرة المناهضة للعسكر , لكن اسمحلي أصدمك عزيزي القارئ , وأقولك ان المسؤول الأول عن المجزرة هو التراس جرين ايجلز و التراس سوبر جرين .. ايوا زي ما بقولك بالضبط!

مفيش بلطجي هيهتم بسرقة بانر او تي شيرت فرد من جروب منافس اللي هو يعد عار في عالم الالتراس , مفيش بلطجي وهو بيقتل هيسأل ويقول فين الأعضاء الأكتيف في الجروب ؟ مفيش بلطجي هيعرف يمسك شمروخ أساسا , ويطفيه في جسم شخص واقف قدامه .. وشهادات اعضاء التراس أهلاوي العائدين من بورسعيد بتأكد كل الأحداث دي

و لو حابب تتأكد ان الموضوع كان هيحصل في جميع الحالات - حتى لو بنسبة أقل -  و إنه في الأصل " تار بايت " ولكن التواطؤ الأمني هو اللي أدى لحدوث المجزرة .. ممكن تشوف الفيديو دهـ




ايوا الحقيقة مرة , ايوا الالتراس في مصر بدأ يخرج عن معناه و مبادئه الرئيسية وبدأ يتجه لحرب شوارع , أيوا بعض اعضاء مجموعات الاولتراس المصريين تحولوا من فرد اولترا يحمل مبادئ الخير والحق والعدل والقوة ومؤازرة النادي .. الى بلطجي ماسك سلاح , أيوا في خلل كبير أصاب مينتاليتي الاولترا المصرية في الفترة الأخيرة .. ايوا سمعنا في السنة او السنتين الماضيتين عن عمليات حرق و خطف و ضرب نار متبادلة بين مجموعات الاولتراس! وكلها أشياء لا علاقة لها من قريب أو من بعيد بالاولتراس مينتاليتي

لكن مصارحة النفس بالواقع و محاولة علاج حلول للمشكلة .. أفضل بكتير من دفن الراس في الرمل و رمي التهمة بكل بساطة على العسكر والداخلية و .. الطرف التالت!

وأحب أفاجئك عزيزي القارئ مرة تانية - ان لم تكن تعلم مسبقا - اننا بعد سنين هنلاقي التراس المصري البورسعيدي بيفتخروا انهم  قتلت جماهير الأهلي , و التراس الزمالك وأندية أخرى بتعاير التراس الأهلي ان بعض أعضائهم قتلوا في بورسعيد

اذا احنا أمام مشكلة اجتماعية حقيقية , بتضرب في أرجاء المجتمع .. و لو ملقيناش ليها حلول جذرية , فاحنا بنعرض المجتمع انه يكون ضحية لحمامات من الدم هتتفجر في السنين القادمة .. لو لم يتم اتخاذ الاجراءات الرادعة وإعطاء كل ذي حق حقه في اللحظة اللي احنا بنمر بيها دي!

ملحوظة على الهامش : في حالة عدم حل جروبين الاولتراس الخاصين بنادي المصري البورسعيدي , و محاكمة ومعاقبة قياداتهم .. فاحنا هنكون تار هيستمر لسنين و دم لن ينتهي 
انه الواقع يا صديقي , فتقبله كما هو .. أو حاول ان تقوم بتغييره :)