الخميس، 17 نوفمبر، 2011

المـؤامرة الكبرى .. هـآآآو

صراحة , مش عارف أبتدي كلامي منين , لإن حالة الجهل و التخلف المنتشرة في كل أرجاء الوطن العربي بلا إستثناء , أصابتني بحالة من الإحباط و فقدان أي أمل .

و رغم إن حكاية العروبة دي مبتفرقش معايا أوي , يعني عن نفسي مش شايفها حاجة الواحد يفتخر بيها او يفرح بيها , عكس مثلا الهوية اللي بتبقى منتمي ليها , و عكس الديانة اللي بشوفها أفضل من الاتنين لإنها الوحيدة فيهم اللي بتختارها بإرادتك " ده اللي هو مفترض يعني في الدول الطبيعية " , باختصار يعني .. أنا شخص العروبة ملهاش أي اهمية بالنسباله و شايفها مجرد كلام فاضي و شعارات رنانة بدون أي قيمة حقيقية

المهم , شوفنا كلنا اللي حصل في 2011 بما يسمى " الربيع العربي " , و بعد نظرة بسيطة على الثورات دي , وجدت العامل المشترك الوحيد هو .. المــؤامـــــرة !!

شئ غريب مش كدهـ ؟
تبص لمصر يقولك مؤامرة ماسونية , تبص لـ ليبيا يقولك مؤامرة اوروبية عشان البترول , تيجي لسوريا هتلاقي  مؤامرة امريكية لضرب ايران , تيجي للبحرين تستنتج انها مؤامرة ايرانية من اجل نشر الفكر الشيعي في الخليج !!

طب معلش سؤال , هي ليه بس الدول العربية هي اللي مستهدفة ؟ ليه مفيش دول غيرنا فيها مؤامرات ؟ ليه مصرين ننكر إرادة الشعوب ؟
ليه مفيش مؤامرة امريكية بتستهدف اليابان ؟ ليه مفيش أجندات في ألمانيا او بريطانيا ؟

ليه مسمعناش عن مؤامرة و أجندة اوروبية لإستهداف تركيا و ماليزيا ؟ مع إنها دول اسلامية برضو , و على حد علمي المؤامرات مبتستهدفش الا المسلمين !

ليه دولة زي السعودية هي اول من قمعت الثورة البحرينية , هي هي برضو في نفس الوقت اول من أيد الثورة السورية و كانت ضد نظام بشار ؟ مش دي مؤامرة و دي مؤامرة !! ولا المؤامرات بتبقى وحشة فقط لما تبقى ضد مصالحي ؟

و ليه برضو في نفس الوقت لما قامت مظاهرات في اسرائيل في أغسطس الماضي , و لما قامت أحداث الفوضى في لندن و اتحرق بسببها بيوت و املاك عامة كتير , و لما قامت مظاهرات احتلوا وول ستريت في امريكا , مسمعناش حد قال مؤامرة شرق اوسطية !! ولا حد قال دي أجندات اسلامية !! 

ليه لازم ننكر إرادة الشعوب اللي اتشجعت شعب ورا التاني و قررت فجأة إنها تبحث عن حرية مسلوبة من سنين , ليه لازم كل حاجة تكون منسوبة لمؤامرة و كإن الشعوب العربية غير قادرة على إحداث أي شئ بمفردها !
التساؤلات اللي فوق دي , و غيرها كتير .. هيوصلنا لإجابة واحدة فقط       

وهي إنه ببساطة يا سادة , المؤامرة دي مجرد وهم في خيالات الشعوب العربية المريضة , أنشأتها حكوماتها الدكتاتورية للتصدي بيها لأي محاولة تغيير يحدث الآن , او قد تحدث لاحقا في دولها ..  و هما عارفين كويس إن الشعوب هتصدق , بسبب حالة تدمير العقول اللي الأنظمة العربية بدون إستثناء قامت بيها بـ كفاءة لمواطنيها في العقود الماضية

و في حال حدوث أي ثورة جديدة في المنطقة , او اي بوادر تغيير جديدة في أي دولة , هنسمع نفس الكلام .. بنفس الطريقة .. بنفس المؤامرة
سواء كانت ماسونية او امريكية او ايرانية , او حتى كوالالمبورية .. المهم إن المؤامرة لازم هتكون موجودة 

كلمة أخيرة

أعزائي العرب , أنا آسف .. تفكيري و عقلي لا يسمحولي إني أفسر كل حاجة تحت نظرية المؤامرة



الاثنين، 14 نوفمبر، 2011

فلان الفلاني

.. فلان الفلاني , من ذكريات 18 يوم صنعت التاريخ

فلان الفلاني اللي كان يومها جنبي ..ساعة لما بدأوا في ضرب الرصاص
فلان الفلاني اللي معرفـش اسمـه  .. فـ دايما بقول يابن عمي وخلاص

فلان اللي سابلـي بقـيت سـنـدوتـشـه .. ليلة لـما شافـني بغـنّي و جـعان
فلان اللي مش فاكرَة غير شكل وشه .. فلان اللي عداكي جوه الميدان

فلان اللي فـتـشني بالإبتـسامه  .. فلان اللي قال هو فعلا هيمشي ؟
فلان اللي قاللي طريق السلامة  ..ساعة لما قولنا زهقنا وهنمشي

فلان اللي مرضيش ياخد مني أجره .. ساعة لما قلت إني رايح مظاهـره
فلان اللي قـاللي هـيـتـنـحى بكـره  .. وهنفرح و نرقص و راح تبقى سهره

فلان اللي كـان بيـنـاولـني القـزايز .. ويقـفـلها بعد أما اعبـيـها جـاز
فلان اللي يشرب ويسألني عايز ؟  ..فلان اللي كان وشه مليان قزاز

فلان اللي مطلعش جوه البرامج .. وكان بس صوته في قلب الهتاف
فلان اللي روح أكل واستحمى .. فلان اللي ضايع في وسط الآلاف

فلان اللي غرقّـلي خـل الكـوفـيه .. و شـالني ساعة لما جـت طلقه فيا
فلان اللي مات يومها تلزمله ديه .. من ابن الفلاني اللي كل لحمه حاف