الخميس، 17 نوفمبر، 2011

المـؤامرة الكبرى .. هـآآآو

صراحة , مش عارف أبتدي كلامي منين , لإن حالة الجهل و التخلف المنتشرة في كل أرجاء الوطن العربي بلا إستثناء , أصابتني بحالة من الإحباط و فقدان أي أمل .

و رغم إن حكاية العروبة دي مبتفرقش معايا أوي , يعني عن نفسي مش شايفها حاجة الواحد يفتخر بيها او يفرح بيها , عكس مثلا الهوية اللي بتبقى منتمي ليها , و عكس الديانة اللي بشوفها أفضل من الاتنين لإنها الوحيدة فيهم اللي بتختارها بإرادتك " ده اللي هو مفترض يعني في الدول الطبيعية " , باختصار يعني .. أنا شخص العروبة ملهاش أي اهمية بالنسباله و شايفها مجرد كلام فاضي و شعارات رنانة بدون أي قيمة حقيقية

المهم , شوفنا كلنا اللي حصل في 2011 بما يسمى " الربيع العربي " , و بعد نظرة بسيطة على الثورات دي , وجدت العامل المشترك الوحيد هو .. المــؤامـــــرة !!

شئ غريب مش كدهـ ؟
تبص لمصر يقولك مؤامرة ماسونية , تبص لـ ليبيا يقولك مؤامرة اوروبية عشان البترول , تيجي لسوريا هتلاقي  مؤامرة امريكية لضرب ايران , تيجي للبحرين تستنتج انها مؤامرة ايرانية من اجل نشر الفكر الشيعي في الخليج !!

طب معلش سؤال , هي ليه بس الدول العربية هي اللي مستهدفة ؟ ليه مفيش دول غيرنا فيها مؤامرات ؟ ليه مصرين ننكر إرادة الشعوب ؟
ليه مفيش مؤامرة امريكية بتستهدف اليابان ؟ ليه مفيش أجندات في ألمانيا او بريطانيا ؟

ليه مسمعناش عن مؤامرة و أجندة اوروبية لإستهداف تركيا و ماليزيا ؟ مع إنها دول اسلامية برضو , و على حد علمي المؤامرات مبتستهدفش الا المسلمين !

ليه دولة زي السعودية هي اول من قمعت الثورة البحرينية , هي هي برضو في نفس الوقت اول من أيد الثورة السورية و كانت ضد نظام بشار ؟ مش دي مؤامرة و دي مؤامرة !! ولا المؤامرات بتبقى وحشة فقط لما تبقى ضد مصالحي ؟

و ليه برضو في نفس الوقت لما قامت مظاهرات في اسرائيل في أغسطس الماضي , و لما قامت أحداث الفوضى في لندن و اتحرق بسببها بيوت و املاك عامة كتير , و لما قامت مظاهرات احتلوا وول ستريت في امريكا , مسمعناش حد قال مؤامرة شرق اوسطية !! ولا حد قال دي أجندات اسلامية !! 

ليه لازم ننكر إرادة الشعوب اللي اتشجعت شعب ورا التاني و قررت فجأة إنها تبحث عن حرية مسلوبة من سنين , ليه لازم كل حاجة تكون منسوبة لمؤامرة و كإن الشعوب العربية غير قادرة على إحداث أي شئ بمفردها !
التساؤلات اللي فوق دي , و غيرها كتير .. هيوصلنا لإجابة واحدة فقط       

وهي إنه ببساطة يا سادة , المؤامرة دي مجرد وهم في خيالات الشعوب العربية المريضة , أنشأتها حكوماتها الدكتاتورية للتصدي بيها لأي محاولة تغيير يحدث الآن , او قد تحدث لاحقا في دولها ..  و هما عارفين كويس إن الشعوب هتصدق , بسبب حالة تدمير العقول اللي الأنظمة العربية بدون إستثناء قامت بيها بـ كفاءة لمواطنيها في العقود الماضية

و في حال حدوث أي ثورة جديدة في المنطقة , او اي بوادر تغيير جديدة في أي دولة , هنسمع نفس الكلام .. بنفس الطريقة .. بنفس المؤامرة
سواء كانت ماسونية او امريكية او ايرانية , او حتى كوالالمبورية .. المهم إن المؤامرة لازم هتكون موجودة 

كلمة أخيرة

أعزائي العرب , أنا آسف .. تفكيري و عقلي لا يسمحولي إني أفسر كل حاجة تحت نظرية المؤامرة



ليست هناك تعليقات: